Мы работаем для Вас с 1919 года.

На главную...

Об издательстве...

Новости...

Книжный магазин...

Скачать прайс-лист...

Как с нами связаться. Как к нам проехать.

On-line

консультации

Все вопросы, связанные с приобретением книг, Вы можете задать нашим специалистам:

*

487295596 - общие вопросы

 

Яндекс.Метрика

 

География посетителей сайта:

Государственное унитарное предприятие Книжное издательство УДМУРТИЯ

ГУП УР «Книжное издательство «Удмуртия» ведет свою историю с сентября 1919 года. За 100 лет издано

свыше 9000 названий книг, учебников, брошюр общим тиражом более 90 млн. экземпляров.

Пресса об издательстве * Та буртчин чуръёсыд

 

Та буртчин чуръёсыд

Ачиз улэп дыръя Ашальчи Окилэн 4 книгаез потüз: «Сюрес дурын» (1925), «О чём поёт вотячка» (1928), «Мар тодüз тракома сярысь Карпа агай» (1930) но «Мон тодам вайисько» (1968). Лина Григорьевна улонысь кошкем бере эшшо куать бичет печатласькиз. Нош туэ, кулэмез дырысен 38 ар ортчыса, дуннеез адзиз «Удмуртия» издательствоын потэм выль книга – «Ашальчи Оки. Та бурчин чуръёсыд. Эти шёлковые строчки».

Татчы пыризы Окилэн кылбуръёсыз, веросъёсыз но со сярысь тодэ ваёнъёс. Книга удмурт но зуч кылъёсын, сое поттон бордын ужазы кык сузэръёс: Россиысь Писательёслэн огазеяськонзылэн ёзчиез, Ашальчи Оки нимо премилэн лауреатэз, кылбурчи Лидия Нянькина но Алнашысь Ашальчи Окилэн музейысьтыз наукая валтüсь ужась Мария Петрова. Книгаен тодматскон ортчиз Алнаш музъем вылын ик Лина Григорьевналэн кулэм нуналаз.

Кызьы кылдüз та книга?

- Таче книга поттон сярысь малпанме сузэрелы, Лидия Нянькиналы, верай ай 2006-тü арын но кури сое Ашальчи Окилэсь веросъёссэ зуч кылэ берыктыны, – шуэ Мария Петрова. – Ар ортчыса, рукопись дась вал ини. Эшшо одüг ар кошкиз туспуктэмъёсты но тодэ ваёнъёсты люканы. Кема ас черодзэ витиз ке но, табере та книгаез киямы кутыны быгатüськом, со чебер пöрмиз. Вылбамаз пуктэмын Ашальчи Окилэн тусыз но вордüськем юртысьтыз укно наличник. Нимыз пумысен кема малпаськи, мыным потüз, солэн кылбуръёсыз буртчин выллем, сыче ик чебер но небыт. Таче ним туж тупа кадь солэн чуръёсызлы, возьматэ Ашальчилэсь пуш дуннезэ.

Ашальчи Оки дунне литератураын нырысетü удмурт нылкышно кылбурчи луэ шуыса, тодüськом. Нош проза удысын кышномуртъёс пöлын кин нырысетüез вал? Нош ик Ашальчи Оки. Солэн нырысетü веросъёсыз печатласькизы 1918-тü арын «Виль синь» газетын. Соберегес ик литературае вамыш лэсьтüз Лем Маня (Мария Баженова), но со Окилэсь бергес печатласькыны кутскиз. Ашальчилэн «Орок» веросэз но «Миквор кышнолэн гур бераз» выжыкылэз чуваш кылын потэмын, но одüг веросэз но та дырозь зуч кылэ берыктэмын öй вал на.

- Ашальчи Окилэсь произведениоссэ зуч кылэ берыктыкум, текстлэсь палэнэ кошкыны, вöзаз мае ке аслэсьтымзэ ватсаны öй дüсьты, номырзэ но чеберъяны öй туртты, – веранзэ мытэ Лидия Нянькина. – Мон котьку тодам вози: со нырысетüез нылкышно прозаик. Вылаз ик, удмурт литература соку гинэ жужаны öдъя вал ай, кызьы тае лыдэ басьтытэк? Озьыен, Ашальчи Окилэн вань гожъямъёсыз дуноесь но тунсыкоесь луо. Нялтас вераса, прозаезлы мон туж синмаськи. Со тунсыко сюжетъёс кылдытъя, веросъёссэ туж чебер кылын гожтэ, геройёссэ яркыт возьматэ, шöдüське пичиослэсь психологизэс зеч валамез но ачиз шоры серем пыр учкемез. Ашальчи Окилэн произведениосыз пальпотто но мур малпаськыто, малы ке шуоно отын удмурт калыклэн улэм-вылэмез адзиське.

Филология наукаосъя кандидат, литературая критик Вера Пантелеева верамъя, таче книга потыны кулэ ни вал ог 30-40 ар талэсь азьло.

- Удмурт кун университетысь зуч филология факультетысь студентъёсты удмурт литератураен тодматыкум, вералляй, макем паймымон но тунсыко кылбурчи вал Ашальчи Оки. Соос пумитам шуо: сокем ушъяськоды но, мар сыче начар сборникъёсыз? Табере та книгаез мон студентъёслы дэмланы быгато возьдаськытэк. Со сочинениосты люкан выллем. Книга дуно луэ зеч туспуктэмъёсын, зуч но удмурт кылбуръёсын но веросъёсын. Тодэ ваёнъёсты лыдзыса, та адямиез мургес тодü. Мае кылбуръёсыз уг шараяло, улонысьтыз учыръёс сое возьмато. Школаын но вузъёсын дышетскисьёслы сяна, та книга туж кулэ луоз Ашальчи Окилэн зучомыны вуэм чыжы-выжыосызлы. Пусйыны кулэ Лидия Нянькинаез, со, вань быгатонлыксэ огазеяса, берыктэм Окилэсь произведениоссэ, зуч текстъёс туж усто пöрмиллям. Мон та книгаез чебер суредэз кадь учки, чебер кырзанэз кадь кылзü, – шуэ Вера Григорьевна.

Книгаен тодматскон туж шуныт мылкыдын ортчиз. Алнашысь «Вуюись» ансамбль быдэстüз удмурт кылбурчилэсь кырзанъёссэ, нылпиос лыдзизы кылбуръёссэ. Байтэрек культура юртысь усточиос А. Окилэн «Культпоход» веросэзъя сценка возьматüзы. Чыжы-выжыез сярысь тодэ ваёнъёссэ вераз Владимир Векшин, УдГУ-ын ужасьёслэн профсоюзэнызы кивалтüсьлэн воштüсез.

- Мынам анае – Ашальчи Окилэн бадзым агаезлэн, Николай Григорьевичлэн, нылыз. Кусыпъёсмы матын вал, ми улüмы Варзи-Ятчиын, Лина апаймы – Алнашын. Со мыным пересь но висись йöтылüз. Но арлыдыз шоры учкытэк, туж етüз, визьмо вал. Кузпалэныз туж трос лыдзиськизы. Кыксы ик ушъязы но лыдзыны дэмлазы Лев Оваловлэсь «Медная пуговица» романзэ. Классикъёс пöлысь тужгес но гажаз Антон Чеховез но Сергей Есенинэз. Яратоно кырзанэз вал Александра Пахмутовалэн но Николай Добронравовлэн «Забота у нас простая» нимаськисез. Мыным паймымон потэ вал солэн трос но чем кыскемез. Врачъёс öз лэзьылэ пурккетыны, тазалыкез укыр лябзем бере гинэ Лина апай куштüськиз урод сямызлэсь. Синпельлы кылизы Лина апайлэн кузьмам кунгожсьöр кылъёсъя словарез но войнаысь ваем Цейсовской биноклез. Жаляса верано, та кузьымез ышиз. Сиён пöзьтыны Лина апай туж ик уг быгаты вал, но солэн туж бадзым пöраськон книгаез вал. Отысь учкыса, со туж ческыт торт пыжылüз, сычезэ мынам нокинлэсь но сиеме öй вал. Мон шумпотüсько, Алнашын солэсь нимзэ утё шуыса. Асме но тüледыз зечкыласько таче книга потэмен. Нылпиосылы одно ик сое ысто, мед тодозы но данъяськозы, кыче паймымон чыжы-выжымы милям вал, – шуиз Владимир Векшин.

Книга зэмен но туж тунсыко пöрмемын. Сое лыдзыса, Лина Григорьевна Векшина выль сямен усьтüське. Кин ке паймоз солэн ужамезлы, мукетыз чидамезлы. Мон азьын но усьтüськиз воксё мукет Ашальчи Оки. Со кылбуръёсаз кадь возьдаськись öвöл, туж дüсьтüсь, юн сямо но чылкыт сюлэмо. Мон татчыозь уг тодüськы вал, Ашальчи Оки гожъяськем Англиысь писателен, «Овод» романлэн автореныз Этель Лилиан Войничен но венгер писателен Мате Залкаен. Вань со гожтэтъёсты но туспуктэмъёсты 1935-тü-1936-тü аръёсы обыск дыръя талаллям. Уг тодüськы вал, Ашальчи Оки Казаньысь «Медприбор» заводысь кык слесарьёсты операцилы тупась инструментъёс лэсьтыны курем шуыса. Уг тодüськы вал, Оки Сергей Есенинэз ватыны ветлэмын шуыса. Книгалэсь берпуметü бамзэ ворсатозь, сыче «уг тодüськы вылэмъёс» туж трос люкасько. Мукетъёсыз но та книгаез лыдзыса, тодозы, кыче вылэм Лина Григорьевна улонын, уж дураз, войнаын, пытсэт сьöрын но семьяяз. Солэн веросъёсыз но кылбуръёсыз сокем трос öвöл, чок, ужпум лыдпус бордын öвöл ук. Ашальчи Окилэн бурчин чуръёсыз дауръёсын уз вунэ. Озьыен, Гердлэн кылъёсыз зэмалозы:

Лымы туж жог шуна, быре -

Уз кыс, уз быр кылбуръёсмы.

Гожтэм чебер книгаосмес

Калык выльысь кутса лыдзоз…

Галина Семёнова. Туспуктüз Владимир Беломорских.

Источник: Газета "Удмурт Дунне" № 168-169 (24907-24908) 11.11.2011г.

© ГУП УР «Издательство «Удмуртия», 2006-2019 udgiz.ru

Скачать удмуртские шрифты Times New Roman Udm(остальные) Arial Udm, Courier Udm, Verdana Udm, Поиск,