Шарканэ вуиз
выжыкыл
Шаерысьтымы «Удмуртия»
издательствоын трос выль книгаос
печатласько. Городын улüсьёс
соосын тодматскыны, киязы
кутылыны, кельшымонзэ басьтыны
быгато ке, гуртоослэн сыче
луонлыксы öвöл. Библиотекаосы но
соос öжыт вуо.
Югдурез тупатон понна
шаерысьтымы Нациосын ужан
политикая министерство но почта
огкыл кутüзы. Эскерон вылысь
Шаркан ёросэз бырйизы. Табере
шарканъёс, городэ вуылытэк ик,
выль книгаосын тодматскыны
быгатозы. 23 пумо книга,
ваньмыз-öвöлэз 900-лэсь трос,
Шаркан ёросэ келямын. Ваньмыз-а
лыдзисьёс кие вуизы? Та сярысь
вераськимы Шаркан почтаысь вуз
карисен Валентина Семёноваен.
- Почтаямы пöртэм арбериосын вуз
кариськомы, - шуэ Валентина
Николаевна. - Зуч книгаосмы но
вал. Табере тани удмуртъёссэ
вуттüзы. Солы шумпотüськомы.
Ёрос центрын улüсьёс сяна,
гуртоос но удмурт книгаосын
тодматскыны быгато. 900-лэсь
ятыр книгаез ёросысь почталэн 15
ёзаз пазьгимы. Вераны кулэ,
куд-ог книгаосты нырысетü
нуналаз ик ур-вар каризы.
Нылпиослы пичи бичетъёс,
буяськон книгаос, веросъёс но
кырзанъёс сяна, бадзым книгаос
но Шарканэ келямын. Соос пöлын
«Мифы, легенды, сказки
удмуртского народа» книга.
Мукетъёсыз сярысь, таиз трослы
дуногес ке но, гуртын улüсьёс
сое но басьтыса быдтüзы ни.
- Нош кыче удысын ужасьёс удмурт
книгалы тужгес кулэясько?
- Нырысь ик вуылüзы удмурт кылъя
но литературая урокъёсты
нуисьёс, - веранзэ азьланьтэ
почтаын ужась. - Шарканэз ке
учконо, котькыче удысын ужасьёс
дорамы вазисько: егит анайёс но
дышетскисьёс, ёрос газетын
ужасьёс но огшоры калык.
Кемалась ик öй вал Шарканын
ортчизы 15-тü Гурт тол шудонъёс.
Черкогуртысь одüгез ульча соку
вуз карисьёсын согемын вал. Соос
пöлын адскизы почта ёзын ужасьёс
но. Соос дорысь одüгез но буш
киын öз кошкы.
- Гуртоос доры но удмурт книгаос
вуизы, лэся, - шуэ Пороз гуртысь
«Факел» огазеяськонэн кивалтüсь
Александр Софронов. - Азьвыл
аръёсы ичигес вал удмурт
книгаос, вылаз ик, соос укыр
бездытэсь. Нош туала арын
печатламъёсыз турлы буёлоесь.
- Нош мон Пашур-Вишур гуртысь
культураез жутüсько, -
вераськонэ итüськиз Инна
Петрова. - Ульфат
Бадретдиновлэсь «Чушъял
вордüське веньёстэк» книгазэ
басьтü. Милемлы пьесаос уг окмо.
Удмурт книгаосыз почта пыр
вайыны луиз но, ужмы ик капчияз
кадь. Куинь книга басьтü ни.
Азьвыл аръёсы тодмоосме басьтыны
косüсько вал, нош табере ваньзэ
почта пыр вуттüзы.
Таче воштüськонъёс шоры ваньмыз
умоен гинэ учко. Та амал улонэ
пычаз ке, мукет ёросъёсысь почта
ёзъёсын ужасьёс но удмурт
книгаосын вуз карозы.
Валентина ЕМЕЛЬЯНОВА
Ссылка на оригинал статьи