Источник: Газета "Удмурт Дунне" №18 (24559) 10.02.2010г.

Бадзым классъёсты дышетüсьёс кема аръёс чоже ужазы Алексей Ермолаевлэн но Пётр Поздеевлэн «Удмурт литература» книгазыя. Та писательёс трос дырзэс висъязы литератураез эскеронлы.

Аръёс ортчемъя но А. Ермолаевлэн но П. Поздеевлэн гожъямъёссы уг вужмо. Удмурт литература, писательёс но соослэн произведениоссы сярысь гожъямъёссы потüзы нимаз книгаен - «Удмурт литературалэн азинскемез сярысь статьяос». Бичетэз дасязы Нина Ермолаева но Евгения Афонова.

Книгаез лыдзыса потй но таче малпанэ вуи: со туж кельшымон пöрмем, чеберлыко произведениез кадь, тунсыкен но капчиен лыдзиськод. Та бичет чакламын нылпиослы, студентъёслы но дышетüсьёслы. Котькуд уроклы узыр материал шедьтыны луэ. Кылсярысь, 9-тй классын ортчиськом Роман Валишинлэсь «Тöл гурезь» повестьсэ. Валишинлэн та произведениез тужгес золэз. Со психологияя роман кадь. Валтüсь героез но одüг гинэ öвöл. Мукетъёсыныз чошатыса, бадзымгес инты басьто Оникейлэн но Юсялэн образъёссы. А. Ермолаев Р. Валишинлы сйзем статьяяз ваньзэ пыр-поч сэрттэ. Тазьы гожтэ: «Произведенный аспöртэм образэз Оникейлэн. Азьвыл председатель со сярысь вылезлы вера: Оникеен керетэмлэсь эскериськы. Сюресъёсты кечевыл луизы ке, тон татын ужась öвöл ни. Солэн кыче ке кужымез вань, калык солэсь туж кылзйське». Зэм но, та воргорон нырысь лушкем кей кадь улэ. Мурт киын активистэз быдтэ. Но пумен йырсазьыз сайка, улэмез шоры мукет сямен учкыны кутске. Люкам зарнизэ но война дыръя танк лэсьтыны сётэ. Озьы калык азьын янгышсэ кулэстыны тырше. Оникейлэн образэз тодэ вайытэ Пётр Блиновлэсь «Улэм потэ» романысьтыз Омелез. Соиз но, таиз но сьблтаськемын вуж улонлэн вотэсъёсыныз. Овöлтэмлы оскыса, Оникей пизэ но Юсяез люке. Юсялы шуэ: «Тон быдэс улондэ кые-дын бугыръяськыса ортчытод. Нош Костя книга-газет борды кариськыны турттэ». Та кылъёс амалтэк тодэ вайыто Омельлэсь инженер эмеспи утчамзэ. Кыкезлэн ик герой-лэн дунне валанзы огкадь: йöно адями луон понна «кыедлэсь», сьöд ужлэсь мозмоно. Нош мукет ласянь, та образъёс туж пöртэмесь. Блинов Омель шоры серемпыр учке, юмор амалэн суреда. Нош Валишинлэн, Оникей сярысь мадьыкуз, чик но сереме уськытон манерыз уг шöдüськы.

Книгаын тунсыко материал сётэмын Игнатий Гавриловъя, Филипп Кедровъя но Николай Байтеряковъя. Бичетлэсь авторъёссэс зеч тодйсько вал бере, та уж мыным А. Ермолаевлы но П. Поздеевлы синпелет выллем потйз. Котькуд чурысьтызы куаразэс кылüсько кадь. Шунытэсь кусыпъёсмы вал Пётр Кирилловичей. Тодэ лыкто студент дыръям спецкурс лыдземез но, диплом ужме гожъякум, юрттэт сётэмез. Котьку но мылысь-кыдысь вазиськылüз, паймытъяз образной вераськеменыз, туж зеч тодэ вал удмурт фразеологизмъёсыз. Ужаны кутскеме бере но Ижын яке Алнашын пумиськон учыръёсы анаелы (институтын огвакытэ дышетскиллям) салам вераны курылüз, но ватсалляз: тодэ на ке, пе, милемыз. Озьы со ассэ ноку но огшоры адямилэсь вылüе öз пуктылы.

Алексей Афанасьевич но туж сабырлы воргорон вал. Книгаез но сыче ик лякыт, йбно но кие кутымон пöрмем. Оскисько, уроклы дасяськыкузы, нылпиос но, дышетüсьёс но татысь асьсэлы трос тунсыкозэ, пайдаёзэ шедьтозы.