Алигес «Удмуртия» издательствоын «Удмурт синоним кыллюкам» нимо книга потüз. Солэн авторез - кылосбур тодосъёсъя доктор, Удмурт кун университетысь профессор Валентин Кельмаков. Валентин Кельмаковичлэн 300-лэсь трос ни печатлам ужъёсыз. Соос пöлысь 50-эз нимаз книгаосын но брошюраосын потэмын. Ваньмыз сüземын удмурт кылэз эскеронлы, дышетонлы. Озьы ик Валентин Кельмаковлэн учебникезъя удмурт кылэз дышето финъёс. Солэсь книгаоссэ уже куто Сыктывкар, Пермь вузъёсысь студентъёс но преподавательёс.

- Валентин Кельмакович, тüледыз нырысь ик зечкыланы кулэ выль уженыды. Асьмелэн, удмуртъёслэн, öй вал на синонимъёсын такем узыр кыллюкаммы.

- Туж бадзым тау. Зэмзэ но, татчыозь öй вал на удмурт синонимъёсын туала кыллюкам. Мар со сыче синонимъёс? Со - пуштроссыя огвыллем яке матын луись кылъёс, но вылтуссыя соос висъясько, пöртэмесь луо. Сыче кылъёсын словарь поттэмын ни вал, но со туала вакытысь куронъёслы уггес ни тупа: отысь синонимъёс примеръёсын туж шер юнматэмын.

- Малы одно ик бордазы кыскизы синонимъёс? Та малпанды кемалась-а кылдüз?

- Студент вакытам ай эшъёсыным чош кутским синонимъёс сярысь материал люканы. Со милемлы туж тунсыко потэ вал. Аръёс ортчизы, эшъёсын люкиськон дыр вуиз, со материал кытчы ке ышиз. Та пумысен малпанэ выльысь, бадзым вис карыса, 5-6 ар талэсь азьло кылдüз. Мон берло аръёсы школаын дышетон учебникъёслы рецензиос гожъян бордын тырши. Син азям туж трос янгышъёс шедьылüзы, синонимъёслы сüзем параграфъёсын но. Кыкетü мугез: удмурт пиналъёслы,

Эту книгу Вы можете

приобрести в нашем магазине

учебникъёс сяна, номыр но ватсаса лыдзоноез öвöл. Мукет калыкъёслэн вань ук. Та ужпумез кинлы ке но жутоно шуыса, нылпиосты жаляса, мон кыллюкам кылдытон борды басьтüськи.

- Книгалы вордскыны кин юрттüз?

- Шумпотыса верано, кыллюкам дуннеез адзиз Финляндиысь М. Кастрен нимо обществолэн юрттэмезъя. Отчы куронэн вазиськиз Удмурт Республикаысь Дышетонъя но наукая министерство. Кыллюкамез поттон понна коньдон висъяны кулэ вал финъёс но асьмелэнъёс - жыныен-жыныен, жаляса верано луэ, озьы öз пöрмы. Соин ик словарез вакчиятыса поттоно луиз. Чакламын вал кык таиз быдза книга поттыны. Но мон талы но шумпотüсько. Шуом, поръёслэн школаын дышетскись нылпиос понна синонимъёсын кыллюкамзы талэсь но пичи.

- Озьыен, таче книгаос мукет ичи лыдъем выжы калыкъёслэн но вань ини?

- Та ласянь зеч ужало комиос. Озьы ик синонимъёсын книга поттыны быгатüзы ни мордваос но чувашъёс.

- Книга кие кутымон, туж чебер пöрмемын. Тиражез но вань гинэ. Озьыен, сое басьтыны мылкыд карисьёс луозы данак.

- «Удмуртия» издательствоын поттэм книгаос туж чебересь луо. Соосты шумпотыса кие кутоно. Кыллюкамлэн тиражез 3 сюрс 100 экземпляр. Эркын вузаськоз 600-эз гинэ. Книгаез басьтыны луоз «Удмуртия» издательствоысь, дуныз - 150 манет.

- Валентин Кельмакович, ойдолэ та кыллюкамлэсь пуштроссэ но öжытак учкоме.

- Отчы пыртэмын 780-лэсь трос синоним чур, 3600-лэсь ятыр кылъёс, кыл тэчетъёс но фразеологизмъёс.

- Шöдüське, туж трос бугыръяськемын журнал-газетъёсын, книгаосын. Калык пöлысь утчасалды ке, синонимъёс эшшо но тросгес шедьысалзы, дыр.

- Соиз шонер. Но мынам ваньзэ кылъёсты пример вылын возьматэме потüз. Соин ик котькудüз кыл басьтэмын кыче ке но газетысь яке книгаысь. Валамон ини, калыкысь кылэмзэ, гуртъёсысь шедьтэмзэ, нимысьтыз печатлам примеръёсын юнматэмын öвöл ке, мон öй пырты. Туж кема ужай та кыллюкам бордын. Басьтылü фольклор текстэз яке художественной книгаез, сое йылысеныз пумозяз лыдзыса потылü. Кыче-мар синоним шеде - ваньзэ люкай.

- Курадзонъёс öй вал-а? Шуом, одüг кыллэн матысь «чыжы-выжыосыз» туж трос, музонэзлэн - одüг но öвöл.

- Книгаез вакчиятыса поттоно вал бере, татчы пыртэмын чем пумиськылüсь кылъёс гинэ. Соин ик та ласянь капчи вал ужаны. Но курадзонъёс пумиськылüзы ик. Тодüсько: синоним радын эшшо быгатозы на трос кылъёс луыны, но соосты пыртыны уг луы, малы ке шуоно печатлам предложениен юнматэмын öвöл.

- Валантэм кылъёслы валэктонъёс сётэмын-а?

- Укыр валантэмъёсыз пумиськыло ке, удмурт кылэз ылё-кырсё тодüсьёс понна ог дасо-кызё учыре, зуч кылэ берыктыса, валэктонъёс сётэмын ик. Куд-огъёссэ, удмурт текстын пумиськисьёссэ, зуч кылын ик пыртü. Кылсярысь: ромашка. Со ик кукейсяська, тöдьысяська.

- Та книга кинлы чакламын?

- Сое кутыны быгатозы дышетüсьёс, озьы ик дышетскисьёс, студентъёс, писательёс. Уката ик - соин капчи луоз ужаны кылбурчиослы. Кылсярысь, кылбурлы кык слогъем пöзьы кыл уг тупа ке, со понна пöзь вариантэз луоз шедьтыны. Татысь котькуд кылэз луэ бырйыны. Одüг кыл ик текстын олокöня пол медаз пумиськы шуыса, сое варьировать (воштыса кутыны), чебергес карыны луэ. Кылсярысь: лыдзыны но чирдыны. Зэмзэ но, чебергес но узыргес кылüське ук.
Озьы ик со юрттоз удмурт кыл бордын ужась но сое эскерись тодосчиослы, кылысь кылэ берыктüсьёслы, журналистъёслы, огшоры гожъясьёслы но лыдзисьёслы.

- Удмурт кылэз али гинэ дышетыны кутскись адями соин ужаны быгатоз-а?

- Кылэз зеч тодüсьлы со бадзым юрттэт луоз. Нош кин али гинэ дышетыны кутске, йырыз гинэ сураськоз, дыр.

- Та книгады мукет ужъёстылэсь висъяське кадь-а?

- Висъяське. Малы ке шуоно азьвылъёсыз зэмос научной изданиос ке вал, таиз лэсьтэмын, научной инъет вылэ пыкиськыса, дышетскисьёслы, дышетüсьёслы но огшоры лыдзисьёслы. Татын теориез öвöл, материал гинэ люкамын, соин ик сое учебно-методической шуыны луоз.

- Синонимъёс пушкын бугыръяськыса, кыче малпанды кылдüз: асьмелэн анай кылмы узыр ик-а?

- Паймымон узыр асьмелэн кылмы. Жаляса верано, ум тодüське со байлыкез. Мон ноку öй малпа, удмурт кылын сомында синонимъёс люкаськозы шуыса. Ай соос ваньмыз шедьтэмын öвöл на.

- Книгалэн вылбамаз, нимыз сяна, вань на «Удмурт кылосбур» гожтэмез.

- «Удмурт кылосбур» сериез азинтыны малпасько дышетскисьёс понна лыдзон книгаосын но справочникъёсын. Оскисько, анай кыл бордын ужась мукет тодосчиос но юрттозы шуыса.а