Героен пумиськытӥз... ТЕЛЕФОН » Книжное издательство Удмуртия ГУП УР г.Ижевск

Ӟечбур!» газет дораз вуэмысь паймеменыз, Завьял ёросысь Юськи гуртысь Мира Васильевна Иванова редакцие жингыртытэк ӧз чида.
– Ӧз яра шат? – йырам шуак таӵе юан куриськиз. Ма, трубкаез ӵапак ачим кутыны шедьтӥ угось.

– Туж яраз. Вань тямыс бамъёссэ ик огшокчемен сямен шумпотыса лыдӟи. Азьвыл «Дась лу!» газет табере тазьы нимаське-а? Кызьы бен ай со мон доры вуылыны кутскиз?

– Ижкарын улӥсь ӟуч кенды гожтӥськиз. Ми соин ӵош С.Л. Скопкарёваез ӟечкылан ужрадын вал. Городын улӥсь ӟуч тодосчи газетмес мыло-кыдо лыдӟе шуыса верамысьтым, мон но, пе, картэлэн анаезлы гожто ай, со лыдӟиськыны яратэ, туж шумпотоз удмурт газетлы.
Мира Васильевналэсь шумпотэм мылкыдзэ тодыса, та черкогуртын улӥсь дышетӥсь П.В. Давыдов солэсь юалляськоно кариськиз. Кызьыгес пӧрмиз вераськонзы – тодматске.

Надежда ЛОПАТИНА.

Трос дано но гажамон адямиос уло но тыршо вашкала Юсь черкогуртын. Ваньзы сярысь вераны кутскид ке, киосысьтыд чиньыосыд уз тырме. Ма чиньыосыд? Быдэс книгалы гожтон-веран тырмысал. Пӧлысьтызы одӥгез яркыт кизилимы – Мира Васильевна Иванова, «Удмуртия» книгапоттониын 30 арлэсь ятыр тыршем мурт (нырысь корректор вал, собере редактор луиз), Удмурт Элькунысь культура удысысь дано ужась, печатья отличник, тодмо прозаиклэн Михаил Коноваловлэн племянницаез.

84 аресаз мынӥсь Мира Васильевна туннэ но мылысь-кыдысь лыдӟиське, пӧртэм пумо выль иворъёсты кылытэк-адӟытэк уз кыльы, калыке потыса, мылкыдзэ шараялоз. Соин сюлмысь вераськыны луэ пӧртэм ужпумъёсъя. Соин но, дыр, со ас бордаз кыске, анайлы сямен, пыдлось мылкыдъёстэ, малпанъёстэ со азьын шараям потэ. Нош та нуналъёсы со ассэ тужгес шудоен шӧдӥӟ «Удмурт дунне» газетэз вӧзы ватсаськиз на уго «Ӟечбур!» газет.

– Нырысь пайми, оло, почта ёзэтын сураськиллям, соку кин ке но газетэзтэк кылёз ук, яке Давыдов-а меда гожтӥз, малпасько, — мылкыдзэ уг ваты Мира Васильевна. Соку ик телефонэ борды… Озьы редакциозь вуи. Тодмо луиӟ Алексей пиелэн кузпалыз, кенэ Наталья Германовна, азьвыл дышетӥсь-историк, гожтӥськыса мыным кузьым лэсьтэм.
Мира Васильевналэн ог кутскыса лыдӟеменыз кӧтыз тырымтэ, кыктэтӥ ползэ лыдӟыса ортчем на, газет сокем ас бордаз кыскем, паймытэм:

– Со адямилы ӟеч мылкыд пыӵатэ, инкуазез яратыны, анаез дунъяны дышетэ – сотэк улон но ӧвӧл ук! Туспуктэмъёсыз чебересь, нылпиослэн ужъёссы тунсыкоесь, мӧйыос но гожъясько! Тани, кылсярысь, Раиса Корепановалэн «Анаелы» кылбурез синву дорозь вуттӥз, кин ке солы крезьгур мед гожтысал на. Шумпотӥ, англи кыллы дышетӥсь но газетэн эшъяськем. Малы мон тодытэк улӥськеме та газет сярысь?!

Мира Ивановалэн лыд-ӟиськыны пуромем мылкыдыз пичи дырысеныз ик вираз пыӵамын, анай-атаез уго тодмо но дано дышетӥсьёс вал: Екатерина Алексеевна Коновалова Можга педучилищеын удмурт кыллы но литературалы дышетӥз, гожъясьёсты будэтӥз. Нош Василий Иванович Филиппов татын ик историлы визьнодаз, заочно аспирантураын дышетскиз. Солэн бадӟым но узыр библиотекаезлы, огшоры лыдӟись гинэ ӧвӧл, профессор но синмаськысал, дыр. Кулэ книгалы тросэз вазиськылӥллям со доры. Соин ик чик паймонэз ӧвӧл, малы чупрес нылашлэн мылкыдыз дышетон удысэ кыскиз. Можга педучилищеысь «Покчи классъёсты дышетӥсь, старшой пионервожатой» отделениез пырпотӥз, тодон-валанзэ будэтӥз Ижысь пединститутын. Удмурт театрлэсь репертуарзэ Мира ялан син азяз возьылӥз, огзэ но адӟытэк ӧз кыльылы.

– Мыным война бере туж секыт аръёсы дышетскыны кылдӥз, – тодаз вае М.В. Иванова. – Тужгес но секыт йӧтӥз пыдлось гуртъёсысь дышетскисьёслы. Дӥськут начар, сиён, нянь ласянь шуг-секытъёс… Озьы ке но, номыр шоры учкытэк, тодон-валан басьтон мылкыд котьку но вормылӥз, со нырысетӥ интыын вал! Училищелэн куинетӥ курсаз дышетскыкум, милемыз, группаысьтымы вить муртэ, практикае Юсь черкогуртэ школа бордын усьтӥськем пионерлагере ыстӥзы. Со республикаысьтымы культура удысын ужасьёслэн нылпиоссылы чакламын вал. Столовоямы кӧтсэ тырыны ӵем пыралляз Москваын службазэ ортчись йӧно воргорон Геннадий Иванов,нырысетӥ разрядэн спортсмен. Синмаськи мон паймымон удмурт пилы, анае но кельшытӥз, семьяез утись-вордӥсь луоз, шуиз, угось анаелы пузэ но вандоз-пилёз вал, тэк пукыны воксё ӧз чидалля. Озьы мон Можга карысь Юсь музъем вылэ вуи…

– Нимды паймымон чебер! Тодэм потэ вылэм: кытысь со шедьтос?

– Со нимысьтыз луэм учырен герӟаськемын. Институтлэн ньылетӥ курсаз дышетскись анае секыт висьыны усем, пекляосыз ужамысь дугдӥллям. Больницаын анае борды егит эмсузэрез – чырткем, чебер еврей нылэз Мира Елисеевнаез – юнматӥллям. Уйин но, пе, лыктоз, чаклалоз вал, сокем уж борды бурмемын вылэм. Кин тодэ, солы луыса ик, оло, анае ӝоген бурмиз, ас удысаз берытскиз. Еврей ныллы тау карыса, анае солэсь нимзэ мыным сётэм.

Мира Васильевналэн анаез училищеын литературной кружокен кивалтӥз, писательёслэн огазеяськонэнызы юн кусып возиз, пумиськонъёс ӵем радъялляз. Аркадий Клабуковез, Трофим Архиповез, Михаил Петровез, Василий Садовниковез, Герман Ходыревез, Геннадий Павловез, Георгий Архиповез… – кинэ но со уг тоды вал! Писательёс доразы но ӵемысь кожаллязы. Куноосты утялтыны шуыса, анаез нылзэ аспӧртэм ческыт шыд пӧзьтыны косылӥз. Нош турын-куарен парем чаен самовар сьӧрын вераськон котьку ик кема кыстӥськылӥз, визьмо но лэчыт ужпумъёсты сэрттылӥзы-пертчылӥзы. Со али но син азьын, вунонтэм…

«Удмуртия» книгапоттониын ужатозяз, Мира Васильевналэн киосыз пыр кӧня книгаос потӥзы! Соослэсь лыдзэс табере ачиз но меӵак вераны быгатоз на меда? Но дышетонъя, шаертодонъя пособиос, книгаос, справочникъёс, учебникъёс, брошюраос дасян но поттон бордын сюлмысьтызы ужамзэс уг вунэты. Ӝажыос вылын соос кема ӧз кылльылэ, котьку лыдӟисьёссэс шедьтылӥзы. Тани «География Удмуртской Республики», «История нашего края», «История этнографии удмуртов», «Удмуртское народное ткачество», «История пионерской организации» книгаос, «Твори, выдумывай, пробуй» серия… Котькуд книгалэн сюресэз сярысь Мира Васильевна данъяськыса, часэн-часэн вераны дась. Со ужан вакытэ книга типографие вуэмезлэсь азьло Москваын Печатья комитетын эскериське вылэм. Соин пичи книгаез поттон понна гинэ но трос шуг-секытъёсты ортчоно луылэм.

Михаил Коноваловлэн 100 ар тырмон юбилееныз валче, Мира Васильевна но писательлэн нылыз Жанна Михайловна Баранова 2005-тӥ арын «Удмуртия» издательствоын «Кизилитэм уйёс ӧвӧл» книга поттӥзы. Та бадӟым уж борды басьтӥськыны муг усем, писательлэн кузпалыз А.А.Устюжанина улонысь кошкем бере: сандык пыдэсысьтыз улонысь зэмос фактъёсты усьтӥсь гожтэтъёс шедьтӥллям. Вакчи улон сюресэз ортчыса, писатель трослы узырмытӥз удмурт литературамес, историен герӟаськем «Гаян» но рабочий класс сярысь «Вурысо бам» романъёс гожтыса.

Туннэ но Мира Васильевна ялан калык пӧлын. Школаямы ортчем «Вуюись» газетмылэсь юбилейзэ радъякумы, со шумпотыса лыктӥз дорамы, нылпи изданиез ӟырдыт кылъёсын ӟечкылаз, бусьтыр кузьмаськиз. Куддыр зэмзэ ик паймоно солэн задор, егит мылкыдызлы, лӧпкытыны быгатэмезлы. Лыдӟиськонэз, книгаез яратэм сяна, М.В. Иванова сяська будэтонэн тунсыкъяське. Вазь тулысысен бер сӥзьылозь солэн азбараз но бакчаяз турлы сяськаос пальышало, мылкыдэз бурдъяло. Лилиосыз гинэ кӧня пӧртэм!

Мира Васильевна Геннадий Максимович кузпалыныз асьсэос кадь ик котыр ласянь адӟем карымон ныл но пи будэтӥзы. Алексей Ижысь гурт возёсъя академиез йылпумъяз, Марина Геннадьевна Удмурт кун университетын кунсьӧр кылъёслы дышетэ, филологи наукаосъя кандидат. Ӵыжин, шуо, писпулэн выжыяз ик усе.